ਟਾਈਮਜ਼ ਆਫ਼ ਪੰਜਾਬ ਬਿਊਰੋ 

ਖਰੜ/ਨਗਗਲ ਫੈਜ਼ਗੜ੍ਹ,24 ਜੁਲਾਈ:- ਮਹਿੰਦਰਾ ਐਂਡ ਮਹਿੰਦਰਾ ਸਵਰਾਜ ਡਿਵੀਜ਼ਨ ਲਿਮਿਟੇਡ ਦੇ ਸਹਿਯੋਗ ਅਤੇ ਮਾਨਵ ਵਿਕਾਸ ਸੰਸਥਾਨ ਵੱਲੋਂ ਚਲਾਏ ਜਾ ਰਹੇ ਪ੍ਰੋਜੈਕਟ ਜਲ ਸਮ੍ਰਿੱਧੀ ਤਹਿਤ ਵਨ ਮਹੋਤਸਵ ਦੇ ਮੌਕੇ ‘ਤੇ ਵਿਸ਼ਾਲ ਪੱਧਰ ‘ਤੇ ਵਾਤਾਵਰਣ ਜਾਗਰੂਕਤਾ ਅਤੇ ਰੁੱਖ ਲਗਾਉਣ ਮੁਹਿੰਮ ਦਾ ਆਯੋਜਨ ਕੀਤਾ ਗਿਆ। ਇਸ ਦੌਰਾਨ ਮਹਿੰਦਰਾ ਸਵਰਾਜ ਡਿਵੀਜ਼ਨ ਦੇ ਕਰਮਚਾਰੀਆਂ, ਸਵੈਸੇਵਕਾਂ ਅਤੇ ਪਿੰਡ ਵਾਸੀਆਂ ਸਮੇਤ 250 ਤੋਂ ਵੱਧ ਭਾਗੀਦਾਰਾਂ ਨੇ ਸਰਗਰਮ ਹਿੱਸਾ ਲਿਆ।
ਚਾਰ ਦਿਨਾਂ ਤੱਕ ਚੱਲੀ ਇਸ ਮੁਹਿੰਮ ਦੌਰਾਨ 600 ਤੋਂ ਵੱਧ ਪੌਦੇ ਲਗਾਏ ਗਏ। ਪਹਿਲੇ ਅਤੇ ਦੂਜੇ ਦਿਨ ਪਿੰਡ ਮਾਣਕਪੁਰ, ਬਲਾਕ ਖਰੜ ਵਿੱਚ ਲਗਭਗ 300 ਪੌਦੇ ਲਗਾ ਕੇ ਹਰਿਆਲੀ ਵਧਾਉਣ ਅਤੇ ਵਾਤਾਵਰਣ ਸੰਰੱਖਣ ਦਾ ਸੰਦੇਸ਼ ਦਿੱਤਾ ਗਿਆ।
ਤੀਜੇ ਅਤੇ ਚੌਥੇ ਦਿਨ ਪਿੰਡ ਨਗਗਲ ਫੈਜ਼ਗੜ੍ਹ ਵਿੱਚ ਪ੍ਰੋਜੈਕਟ ਜਲ ਸਮ੍ਰਿੱਧੀ ਤਹਿਤ ਨਵੀਨੀਕਰਿਤ ਮਿੱਠੇ ਪਾਣੀ ਦੇ ਤਲਾਬ ਦੀ ਚਾਰਦੀਵਾਰੀ ਦੇ ਆਲੇ-ਦੁਆਲੇ 300 ਤੋਂ ਵੱਧ ਪੌਦੇ ਲਗਾਏ ਗਏ। ਇਸ ਮੌਕੇ ‘ਤੇ ਵਾਤਾਵਰਣ ਸੰਭਾਲ, ਜਲ ਸੰਰੱਖਣ ਅਤੇ ਜੈਵਿਕ ਵਿਭਿੰਨਤਾ ਬਾਰੇ ਜਾਗਰੂਕਤਾ ਸੈਸ਼ਨ ਵੀ ਆਯੋਜਿਤ ਕੀਤੇ ਗਏ।
ਚੌਥੇ ਦਿਨ ਨਗਗਲ ਫੈਜ਼ਗੜ੍ਹ ਵਿਖੇ ਨਵੀਨੀਕਰਿਤ ਤਲਾਬ ਦਾ ਉਦਘਾਟਨ ਕੀਤਾ ਗਿਆ ਅਤੇ ਇਸ ਨੂੰ ਪਿੰਡ ਦੇ ਸਰਪੰਚ ਅਤੇ ਸਮੂਹ ਪਿੰਡ ਵਾਸੀਆਂ ਨੂੰ ਲੋਕ ਅਰਪਿਤ ਕੀਤਾ ਗਿਆ। ਇਸ ਸਮਾਗਮ ਵਿੱਚ ਮਹਿੰਦਰਾ ਸਵਰਾਜ ਦੀ ਲੀਡਰਸ਼ਿਪ ਟੀਮ, ਸੀਐਸਆਰ ਟੀਮ, ਪਲਾਂਟ ਹੈੱਡ, ਕਰਮਚਾਰੀ, ਸਵੈਸੇਵਕ ਅਤੇ ਪਿੰਡ ਦੇ ਪ੍ਰਤੀਨਿਧੀ ਵਿਸ਼ੇਸ਼ ਤੌਰ ‘ਤੇ ਹਾਜ਼ਰ ਰਹੇ।
ਇਸ ਮੌਕੇ ਬੋਲਦਿਆਂ ਅਧਿਕਾਰੀਆਂ ਨੇ ਕਿਹਾ ਕਿ ਪ੍ਰੋਜੈਕਟ ਜਲ ਸਮ੍ਰਿੱਧੀ ਦਾ ਉਦੇਸ਼ ਜਲ ਸਰੋਤਾਂ ਦੀ ਸੰਭਾਲ, ਵਾਤਾਵਰਣ ਸੁਰੱਖਿਆ ਅਤੇ ਸਮੁਦਾਇਕ ਭਾਗੀਦਾਰੀ ਨੂੰ ਮਜ਼ਬੂਤ ਕਰਨਾ ਹੈ। ਰੁੱਖ ਲਗਾਉਣ ਅਤੇ ਤਲਾਬਾਂ ਦੇ ਨਵੀਨੀਕਰਨ ਵਰਗੀਆਂ ਪਹਿਲਾਂ ਨਾਲ ਨਾ ਸਿਰਫ਼ ਹਰਿਆਲੀ ਵਧੇਗੀ, ਸਗੋਂ ਭੂਜਲ ਰੀਚਾਰਜ, ਜੈਵਿਕ ਵਿਭਿੰਨਤਾ ਅਤੇ ਟਿਕਾਊ ਵਿਕਾਸ ਨੂੰ ਵੀ ਪ੍ਰੋਤਸਾਹਨ ਮਿਲੇਗਾ।

Author: Times of Punjab24

Times of Punjab 24 is a fast-growing digital news platform dedicated to delivering accurate, timely, and reliable news from Punjab and across the globe.